首页—〉星闻追踪—〉2002年—〉吕颂贤运动痴 攀石心惊胆跳
吕颂贤运动痴 攀石心惊胆跳

  吕颂贤向来嗜好多多,口中不时挂赛车、潜水、踩单车和健身等话题,所有运动无一不欢,唯独多年来把感情事收得密密绝口不提,全因Jacky(吕之洋名)与女友感情稳定,毋须向外交代:「要我公开结婚摆酒,即系逼我做多场戏畀观众睇。」

  吕颂贤九一年踏足演艺界,至今已有十一个年头,但当中八年光景,均与女友一同度过。入行至今绯闻不多的吕颂贤,起初与比他年纪较大的麦景婷走在一起,旁人大多不看好,但Jacky却以「互相了解,感情稳定!」来形容两人关系,「如果大家唔了解,两个人都唔可以埋一齐咁多年啦!当然,两个人相处亦都系一门好深学问,一齐生活其实并唔需要有乜承诺,任何仪式只系一种制度。」

保护女友少提感情

  正如Jacky所言,纵使与女友感情已升华,但他却从没想过结婚这回事:「名分系咪真系咁重要先!我其实都好反叛,做事唔钟意有约束,我互相有共识、有默契,知道对方想要系乜咪得啰!毋须用一张证书维系双方关系,真系觉得冇咁必要;如果有朝一日,我真系结婚的话,一定唔会公开,更加唔会摆酒,我宁愿选择旅行结婚,一来结婚系两个人事,二来摆酒又多繁文缛节,烦都烦死,加上做呢行咁多年,都不知拍过几多次结婚行礼、摆酒场面,真系拍到我惊,依家都仲有好大阴影,如果你要我公开结婚摆酒,即系逼我做多场戏畀观众睇。」

  吕颂贤坚持感情生活是两个人的事情,亦因如此,Jacky八年来将感情低调处理,绝少与女友一同出现公众场合,更从不把恋情挂在口边,Jacky亦百分之百维护女友说:「由始至终我都系低调处理感情啦!何况女朋友已经唔系做呢行,佢做美容生意,我唔想因为自己系圈中人而影响佢,好似有时去外地拍剧,次次记者都会问惊唔惊女朋友挂住呀!女朋友会唔会去探班呢?系咪一定要拖埋佢落水先,可唔可以留番私人空间畀佢呢,佢已经唔系圈中人啦!」

戒烟讲机缘

  吕颂贤嗜好多多,任何运动无论是赛车、潜水、踩单车及健身,Jacky都瓣瓣精,然而女友从没有埋怨过他一句,Jacky语带反叛说:「如果我玩咁健康运动,佢都诈型,我咪去玩唔健康活动啰!其实拍拖同运动,有时都可以同时间进行。」

  Jacky不讳言运动是他生命的一部分:「我依家好似中毒咁!一日唔做运动就会成个人谢晒,可能身体适应啦!但时间分配得好,一定唔会冇时间陪女朋友。」而向来注重健康的吕颂贤近年已戒烟,他说:「我唔系专登逼自己戒烟,只不过突然唔想食咪唔食啰!有时好讲机缘,好似自从自己信佛之后,觉得好多事都系随心所欲。」

信佛后改过自新

  吕颂贤自信佛后令他犹如「改过自新」,性格上有了很大转变,从前脾气刚烈,遇上甚么事情必大吵大闹,但现在却不同,他说:「我已经唔会再好似以前咁执着,每件事都看淡很多,我开始明白任何事都唔系自己想象中咁完美,懂得去拿住平衡点,令自己舒服,令人舒服,勉强的话大家都会好辛苦、好吃力!」

  除了放弃执着,信佛、食斋亦令吕颂贤变得知足,懂得珍惜身边的一切,尤其是工作方面:「依家咁市道,有工作我已经好开心,仲有乜可以期望!」

  「呢两年我成日台湾、内地两边走,不停拍剧,工作未停过咁滞,五月底我又要过台湾拍《大侠史艳文》,反而出埠拍剧我仲开心,因为工作模式同香港唔同,冇咁大压力,整个人都心平气和。」

 

 

【2002-5-27    orisun.com 娛樂圈】

注:以上新闻转贴自見見頌賢報,感谢网友 大嘴鳥 提供资料。
 
首页—〉星闻追踪—〉2002年—〉吕颂贤运动痴 攀石心惊胆跳